Autoriteti Kombëtar për Sigurinë Kibernetike ka zbuluar një tjetër skemë mashtrimi online që synon të vjedhë të dhënat bankare të qytetarëve shqiptarë.
Skema funksionon përmes mesazheve telefonike, ku mashtruesit paraqiten si përfaqësues të Postës Shqiptare.
Qytetarëve u dërgohet një njoftim i rremë për një “dërgesë” të pamundur për t’u dorëzuar pa përditësuar informacionin personal.
Mesazhi përmban një link të falsifikuar që, sapo hapet, çon përdoruesin në një faqe që kërkon të dhënat e kartës së kreditit, duke rrezikuar sigurinë e tyre financiare.
Autoritetet u bëjnë thirrje qytetarëve të shmangin hapjen e lidhjeve të dyshimta dhe të raportojnë menjëherë çdo përpjekje mashtrimi tek strukturat përkatëse të sigurisë kibernetike.
Njoftimi i AKSK:
KUJDES: Mos bini pre e mashtrimeve online!
Autoriteti Kombëtar për Sigurinë Kibernetike ka ndërmarrë menjëherë të gjitha masat për të bllokuar një skemë mashtruese që synonte vjedhjen e të dhënave bankare përmes mesazheve të rreme në emër të Postës Shqiptare.
Domaini i rrezikshëm është raportuar dhe dërguar për bllokim te AKEP.
Kjo fushatë nuk ka lidhje me një aktor të sponsorizuar specifik, por është një tjetër përpjekje për të vjedhur të dhënat e kartave të kreditit, njësoj si rastet e mëparshme që janë hasur nga imitues të Postës Shqiptare.
Kujdes! Mos jepni në asnjë rast të dhënat tuaja bankare apo të kartës përmes formave të dyshimta!
AKSK vijon monitorimin dhe bashkëpunimin e ngushtë me institucionet përgjegjëse për të parandaluar çdo përpjekje për mashtrim digjital.
