Një qytet i lashtë peruan, që dikur ishte një qendër e rëndësishme tregtare mbi 3,000 vjet më parë, është zbuluar së fundmi nga arkeologët.
Qyteti, i njohur si Peñico, ndodhet në provincën Huaura, në veri të kryeqytetit Lima, dhe sipas Ministrisë së Kulturës, mendohet se është themeluar rreth vitit 1800 para Krishtit. Ai shërbente si një nyje strategjike urbane, duke lidhur komunitetet bregdetare të Luginës Supe me zonat malore të Andeve dhe rajonin e Amazonës.
Peñico është ndërtuar 600 metra mbi nivelin e detit dhe përfshin rreth 18 struktura të identifikuara deri më tani, mes tyre ndërtesa publike dhe njësi banimi. Një prej zbulimeve më të rëndësishme është një ndërtim monumental publik, ku janë gjetur skulptura prej balte, objekte ceremoniale dhe bori të punuara në formë guaskash, që dëshmojnë për karakterin fetar dhe ceremonial të vendbanimit.
Studiuesit besojnë se qyteti fitoi rëndësi pas rënies së qytetërimit Caral, një nga më të hershmit në Amerikë. Sot, Peñico është kthyer në një atraksion turistik, me një qendër moderne interpretimi, ambiente pritjeje dhe shtigje të posaçme për vizitorët që duan të eksplorojnë rrënojat e ruajtura.
Hapja e zonës për publikun përkon me organizimin e festivalit të parë kulturor “Peñico Reymi”, që do të mbahet të shtunën. Aktiviteti do të jetë një festë e trashëgimisë lokale, me rituale tradicionale, ekspozita arti dhe një ceremoni të veçantë për nder të perëndeshës Pachamama, simbol i natyrës dhe pjellorisë në kulturën andine.
