Zbulohet nga policia një magazinë me lëndë narkotike në Korçë, e cila ishte kultivuar gati për shitje.
Në pranga në këtë operacion kanë rënë shtatë persona.
Njoftimi i Policisë:
“DVP Korçë/Finalizohet operacioni policor i koduar “Voskopi”.
Zbulohet një magazinë me lidhje të paligjshme të energjisë elektrike, ku thaheshin bimë narkotike dhe përgatitej lëndë narkotike për t’u shitur.
Kapen në flagrancë në ambientet e magazinës, 7 shtetas. Arrestohen pronari i magazinës dhe bashkëpunëtori i tij. Në pranga edhe 2 shtetas, si dhe në hetim 3 shtetase, për moskallëzim të krimit. Shpallet në kërkim 1 shtetas, i dyshuar i përfshirë në këtë veprimtari kriminale.
Sekuestrohen 195 kg lëndë narkotike cannabis sativa (bimë në proces tharjeje), që u gjetën në ambientet e magazinës dhe pajisje që shërbenin për tharjen dhe përgatitjen e lëndës narkotike për shitje. Sekuestrohen edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
Vijon puna për kapjen e këtij shtetasi dhe për dokumentimin e plotë të kësaj veprimtarie kriminale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme”, njofton policia.
