Një sasi prej 12 metër kub fishekzjarrë me fuqi të lartë shpërthyese, që do të hidheshin në treg, për Vitin e ri, është sekuestruar nga Policia e Tiranës.
Në pranga ka përfunduar pronari i tyre me iniciale V.M, si dhe është nën hetim pronarja e subjektit që i kishte vënë në dispozicion ambientin për magazinimin e tyre.
Sasia e lëndëve piroteknike është gjetur tek tregu ushqimor në Qytetin e Nxënësve, jashtë çdo kushti të sigurisë teknike dhe të futura kontrabandë.
Të gjithë personat e përfshirë në aktivitet të tillë akuzohen për veprat penale “Falsifikimi i dokumenteve, vulave, stampave dhe formularëve”, “Kontrabandë me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Tregtim dhe transportim i mallrave që janë kontrabandë” dhe “Shkelje e të drejtës së pronësisë industriale”.
Gjatë kontrolleve të nisura që prej fillimit të muajit dhjetor, në të gjithë vendin janë konstatuar e goditur edhe disa raste të tjera në Dibër, Tiranë, Durrës, Lezhë e Korçë, ku janë vendosur nën hetim 5 persona.
Vetëm javën e fundit në të gjithë vendin janë kontrolluar 378 subjekte, dyqane të ndryshme, makete apo supermarkete, si dhe tregje të shumicës.
Urdhri
Policia vepron në bazë të një urdhri të firmosur tre ministra në vitin 2018, për ndalimin e hedhjes në treg të lëndëve piroteknike dhe fishekzjarrëve për përdorim civil.
Në kuadër të masave ligjore që ndërmerren nga Ministria e Brendshme dhe institucionet e tjera shtetërore për vendosjen e një regjimi të ri që synon bllokimin e lëndëve piroteknike dhe fishekzjarrëve është firmosur urdhri i përbashkët nga ministri i Brendshëm, ministri i Mbrojtjes dhe ministri i Financave dhe Ekonomisë. Në urdhrin e përbashkët të tre ministrave është specifikuar se artikujt që do të ndalohen të hidhen në treg janë: të kategorisë 2 (F2), përdorimi i të cilave në mjedise të hapura jashtë ndërtesave, kërkon një distancë nga 5 deri në 8 metër nga njerëzit dhe objektet; të kategorisë 3 (F3), përdorimi i të cilave në mjedise të hapura kërkon një distancë mbi 25 metër nga njerëzit dhe objektet.
/Gazetareforma.com/
