Gjykata e Durrësit ka dhënë sot masën e sigurisë burg pa afat për autorët e dyshuar të dy atenteve në Durrës, ku humbën jetën, Klevis e Besmir Haxhia, Dorian Shkoza dhe Anxhelo Avdia.
“Report Tv” ka zbuluar, se bashkëpunëtori i Altin Ndocit është Klevis Alla.
Sipas organit të akuzës, ka prova të shumta që këta dy persona janë autorë të vrasjeve.
Në vendin e ngjarjes policia ka gjetur 55 gëzhoja të cilat dolën nga mjeti tip “Toyota”, ku ndodheshin autorët e atentatit ndaj vëllezërve Haxhia.
Përtej bashkëpunimit të 22-vjeçarit, detaji që fundosi autorët ishte xhami i makinës së përdorur për vrasjen.
Gjatë ekzekutimit, të akuzuarit parakaluan makinën e vëllezërve Haxhia dhe më pas i ekzekutuan me breshëri.
Policia ka gjetur në vendngjarje një pjesë të xhamit të thyer të makinës së autorëve dhe më pas është konfirmuar edhe nga kamerat e sigurisë.
Makina e autorëve u gjet në Arapaj, ndërsa armët e krimit në një kanal mes Nishtullës dhe Shkozetit.
“Në vendin e ngjarjes ka rezultuar se disa metra para mjetit të viktimave MBI asfaltin janë gjetur xham me ngjyrë të errët të thyera dhe nga këqyrja e njërës pjesë të xhamit janë shkronjat ‘TOYO…”. Pra që ngrenë dyshimin se këto pjesë xhami me ngjyrë janë lënë nga mjeti i autorëve që mund të jetë i mjetit “Toyota”. Nga këqyrja e pamjeve filmike ka rezultuar se rreth orës 16:35 në kamerat filmike në rrugë largohen në drejtim të mbikalimit te Nishtulla në Shkozet një atomjet me ngjyrë të zezë që dyshohet në përdorim nga autorët”, thuhet në dosjen e Prokurorisë.
