Një stuhi e fuqishme që goditi ishullin Sanday në shkurt të vitit 2024 solli në sipërfaqe një zbulim të rrallë: mbetjet e një anijeje të vjetër prej druri, të fshehura për shekuj në rërën e plazhit të këtij ishulli të largët skocez.
Ky zbulim u prit me entuziazëm nga komuniteti i vogël prej rreth 500 banorësh, të lidhur ngushtë me detin, si burim jete por edhe rreziku.
Edhe pse Sanday është dëshmitar i qindra mbytjeve anijesh, mbi 270 që nga shekulli XV, kjo anije tërhoqi vëmendje të veçantë. Banorët u mobilizuan menjëherë: fermerët përdorën traktorë dhe rimorkio për të shpëtuar mbi 12 ton dru lisi nga plazhi, ndërsa studiuesit lokalë nisën kërkimet për të identifikuar origjinën e saj.
Falë analizave të hollësishme të unazave të pemëve, u zbulua se druri i anijes vinte nga jugu i Anglisë dhe datonte në mesin e viteve 1700. Anija rezultoi të ishte HMS Hind, një fregatë luftarake me 24 topa, e ndërtuar në vitin 1749.
Ajo kishte marrë pjesë në operacione ushtarake të rëndësishme, si rrethimet e Louisbourg dhe Quebec.
Më vonë, pas përfundimit të shërbimit ushtarak, HMS Hind u kthye në një anije balenash dhe operoi në ujërat e Groenlandës deri në vitin 1788, kur u mbyt pranë brigjeve të Sanday-t. Të gjithë 56 anëtarët e ekuipazhit arritën të shpëtonin.
Mbetjet e saj po ruhen tani në Qendrën e Trashëgimisë së Sanday-t, me shpresën për t’u ekspozuar në publik në të ardhmen.
Ky zbulim i rrallë jo vetëm që nxjerr në pah një faqe të harruar të historisë detare britanike, por edhe forcon ndjenjën e identitetit dhe lidhjes kulturore të komunitetit me të kaluarën e tyre.
