Ministri i Brendshëm, Ervin Hoxha, së bashku me Drejtorin e Përgjithshëm të Policisë së Shtetit, Ilir Proda, nisën nga Tirana prezantimin e 12 drejtorëve të rinj të policisë në nivel vendor.
Emërimi i Elton Alushit përfaqëson jo vetëm një hap përpara në konsolidimin e strukturave të sigurisë, por edhe një angazhim të ri për të përmbushur pritshmëritë e qytetarëve të kryeqytetit, ku sfidat janë të shumta dhe dinamike, nën vizionin “Shqipëria 2030, shprehet ministri Hoxha.
Ai theksoi më tej se Tirana, si qendra kryesore administrative, ekonomike dhe sociale e vendit, ka nevojë për një Polici që të jetë jo vetëm vigjilente dhe efektive në parandalimin dhe luftimin e krimit, por gjithashtu të jetë e afërt me komunitetin, duke ndihmuar në ndërtimin e lidhjeve besimi dhe bashkëpunimi.
Hoxha kërkoi njëhetim të shpejtë dhe të plotë të ngjarjeve kriminale, si dhe rihapjen e hetimeve për çështje të vjetra, të cilat, nëse nuk ndiqen dhe ndëshkohen, mund të shkaktojnë pasoja zinxhir.
Në Durrës u prezantua Drejtor Vilson Bala.
Ky qytet ka rëndësi strategjike për shkak të pozicionit, si një portë hyrëse për Shqipërinë. Kjo e bën atë të përballet me sfida komplekse në fushën e sigurisë publike dhe luftën kundër kriminalitetit. Për këtë arsye, drejtimi i strukturave policore në këtë zonë kërkon një vizion të qartë, strategji dhe përkushtim maksimal për zbatimin e ligjit me paanshmëri dhe profesionalizëm, u shpreh ministri Hoxha.
Hoxha shtoi se Durrësi, si një nga qendrat kryesore ekonomike, turistike dhe të tranzitit, kërkon një qasje të koordinuar për të garantuar një mjedis të sigurt për qytetarët dhe vizitorët.
Struktura e re drejtuese do të punojë ngushtë me agjencitë ligjzbatuese për të luftuar çdo formë të krimit të organizuar, trafiqeve dhe evazionit. Siguria nuk është vetëm një përgjegjësi e policisë, por një detyrë e përbashkët e gjithë shoqërisë, tha ministri i Brendshëm.
