Pas arrestimit të Safet Bajrit në Shkodër me urdhër të SPAK, kanë dalë në dritë detaje të reja mbi çështjen.
Burime pranë SPAK bëjnë me dije se Bajri është ndaluar me urdhër të GJKKO-së dhe ndaj tij është caktuar masa e arrestit. Po ashtu, masë sigurie është vendosur edhe për Asmer Bilalin dhe Behar Bajrin.
Sipas hetimeve, Safet Bajri dyshohet se ka bashkëpunuar me Asmer Bilalin në ekzekutimin e Fatbardh Liçit, ngjarje për të cilën është dhënë masa e arrestit.
Ndërkohë, Asmer Bilali ndodhet aktualisht në burgun e Reçit, ku pritet t’i komunikohet akuza e re.
Si ndodhi vrasja e Fatbardh Liçit?
Fatbardh Liçi u ekzekutua me armë zjarri në një atentat teksa po pinte kafe në një lokal në lagjen “Kiras” të Shkodrës.
Ai ishte një nga të dyshuarit për vrasjen e Astrit Kurmenajt në vitin 2011 dhe vëllai i Mustafa Liçit. Gjithashtu, 53-vjeçari ishte kunati i biznesmenit Lulzim Kulla.
