Policia e Fierit ka nisur një procedim penal ndaj Koço Kokëdhimës, Presidentit të Klubit Sportiv Apolonia, për incidentet që ndodhën gjatë ndeshjes së djeshme në stadiumin “Loni Papuçiu”.
Gjatë takimit mes ekipit të femrave të Apolonisë dhe Gramshit, Kokëdhima ka hyrë në fushë dhe ka shtyrë gjyqtarin Dorjan Melataj.
Si pasojë, specialistët e Komisariatit të Policisë Fier referuan rastin në Prokurori, duke nisur procedimin penal ndaj Kokëdhimës, 65 vjeç, banues në Tiranë, për veprën penale “Veprime të dhunshme në aktivitete sportive”. Ngjarja ka ndodhur gjatë ndeshjes së futbollit FK Apolonia-FK Gramshi, ku Kokëdhima ka ndërhyrë në fushë dhe ka pasur një përplasje me gjyqtarin, duke përdorur fjalë fyese dhe duke e shtyrë atë.
Për shkak të tensioneve të krijuara, ndeshja u ndërpre për 25 minuta. Pamjet e incidentit, të cilat u bënë virale në rrjetet sociale, tregojnë Kokëdhimën dhe zyrtarë të tjerë të Apolonisë duke u drejtuar ndaj gjyqtarit në një mënyrë agresive.
