Ditën e djeshme u raportua për një sherr masiv të ndodhur mes dy familjeve në Berat, për shkak të një toke me ullinj.
Ngjarja e rëndë ka ndodhur në lagjen “Barrikada”, dhe në sherr janë përfshirë familjet Alibeaj dhe Dhana të cilat kanë një konflikt për mbjelljen e ullinjve, ku mbetën të plagosur disa persona.
Së fundmi, Policia e Shtetit ka zbardhur sherrin mes dy familjeve, duke njoftuar se shkaktari i nisjes së konfliktit, Kristo Dham, është arrestuar.
Mësohet se 52-vjeçari gjatë konfliktit ka goditur me mjet prerës, 18-vjeçarin Altjon Alibeaj dhe ndërkohë në sherr u përfshinë edhe familjarë të tjerë.
18-vjeçari është dërguar me urgjencë në spital dhe ndodhet nën kujdesin e mjekëve, ndërkohë nën hetim nga Policia janë G.A., 46 vjeç, E.A., 44 vjeç, dhe M.Dh., 38 vjeçe.
Njoftimi i Policisë:
Ngjarja ka ndodhur në lagjen “Barrikada” në Berat, ku dy pjesëtarë të dy familjeve, për motive ende të paditura, janë konfliktuar fizikisht me njëri- tjetrin. Për të shuar konfliktin janë futur edhe persona të tjerë të familjes, të cilët kanë marrë dëmtime. Pas ngjarjes, uniformat blu kanë bërë arrestimin e K.Dh i cili ka plagosur rëndë njërin prej tyre, e ndërsa janë vënë në hetim tre të tjerë G.A., 46 vjeç, E.A., 44 vjeç, dhe M.Dh., 38 vjeçe. Ndaj tyre rëndojnë akuzat për veprat penale për shtetasin K.Dh “Plagosje e rëndë me dashje” dhe “Plagosje e lehtë në bashkëpunim”, e ndërsa i plagosuri me thikë A.A., është dërguar me urgjencë në spital, ku ndodhet nën kujdesin e mjekëve.
