Ditën e sotme ka hyrë në fuqi paketa ligjore Anti-KCK, që u miratua në mbledhjen e Këshillit të Ministrave.
Ky ligj parashikon hetimin e 91 krimeve të parashikuara në Kodin Penal, nga vjedhja me armë, tek droga, grupi i strukturuar kriminal, vrasja, falsifikimet, plagosja, rrëmbimi, prostitucioni, terrorizmi, korrupsioni i çdo zyrtari publik e deri tek krimi zgjedhor.
Kjo strukturë ka të drejtë të nisë hetim pasuror për individët që dyshojnë se niveli i jetesës nuk mbulohet nga të ardhurat.
Disa orë pas kalimit të aktit normativ Policia e Shtetit ka gati listën me 250 subjektet e para ku do ndërhyjnë. (Lexo këtu)
Së fundmi, Shqiptarja.com ka zbardhur kategoritë që do kontrollohen nga kjo paketë.
Në kontroll do merrem personat e dënuar për krime të rënda, për pjesëmarrje dhe kryerje të krimeve në organizata kriminale, bandat e armatosur, grupet e strukturuar kriminale, pjesëmarrje dhe kryerje të krimeve nga organizata terroriste e të krimeve për qëllime terrosiste.
Po ashtu, subjekt do jenë edhe personat nën hetim brenda e jashtë Shqipërisë.
Ata që do përjashtohen janë personat ndaj të cilëve janë pushuar akuzat apo çështja penale dhe personat që janë shpallur të pafajshëm.
“Masat parandaluese me karakter pasuror të parashikuara në këtë akt normativ nuk vendosen mbi pasurinë që para hyrjes në fuqi të këtij akti normativ, është në proces shqyrtimi gjyqësor ose për të cilën është disponuar me vendim gjykate në zbatim të legjislacionit penal, ligjit për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë si dhe legjislacionit mbi financimin e terrorizmit”, thuhet në paketën Anti-KÇK.
Me projektligjin e ashtuquajtur anti “Kap Çfarë të Kapim”, qeveria parashikon ndryshime thelbësore sa i përket kontrollit dhe përgjimit të personave të dyshuar si të përfshirë në akte kriminale apo terrorizëm.
