Prokuroria Themelore në Prishtinë ka ngritur aktakuzë ndaj katër personave: Naim Murselit, Granit Plavës, Kushtrim Kokallës dhe Tom Dodajt, të cilët akuzohen për vrasjen e 30-vjeçares Liridona Ademaj më 30 nëntor 2023.
Sipas aktakuzës, bashkëshorti i viktimës, Naim Murseli, ka planifikuar vrasjen e gruas së tij si hakmarrje për konfliktet familjare dhe martesore mes tyre.
Ai i ka ofruar Granit Plavës një shumë prej 30 mijë eurosh për të kryer vrasjen, ndërsa arma e përdorur në këtë krim është siguruar nga Tom Dodaj për 280 euro.
Fillimisht, Naimi i kërkoi kushëririt të tij, Kushtrim Kokalla, të kryente vrasjen, por ai refuzoi. Megjithatë, Kokalla prezantoi Granit Plavën, i cili pranoi të kryente krimin për shumën e përmendur.
Më 29 nëntor 2023, Naimi siguroi armën dhe fishekët dhe ia dorëzoi Plavës, i cili, sipas aktakuzës, qëlloi viktimën me një plumb në kokë teksa ajo ndodhej në automjet me dy djemtë e mitur dhe bashkëshortin.
Momenti i vrasjes u inskenua si një grabitje, ndërsa Naimi, pas ekzekutimit, u largua nga vendi i ngjarjes me dy fëmijët. Sipas akuzës, ai e kishte mbajtur Liridonën për krahu për të mos lejuar shmangien nga plumbi.
Në aktakuzë thuhet se, pas datës 25 qershor 2022, kur është paguar polica e sigurimit jetësor në emër të Liridona Murselit për 3.000.000 kruna suedeze, Naim Murseli i ka shpalosur planin e likuidimit të bashkëshortes së tij Kushtrim Kokallës dhe i ka kërkuar atij të gjejë mundësi për vrasjen e saj.
Akuzat ndaj të pandehurve
1. Naim Murseli, Granit Plava dhe Kushtrim Kokalla akuzohen për “Vrasje të rëndë” sipas nenit 173 të Kodit Penal.
2. Granit Plava akuzohet edhe për “Mbajtje të paautorizuar të armëve” sipas nenit 366, pasi arma e përdorur u gjet gjatë bastisjes në shtëpinë e tij.
3. Kushtrim Kokalla akuzohet për “Moslajmërim të veprave penale” sipas nenit 378, pasi nuk njoftoi autoritetet për planin kriminal.
4. Tom Dodaj përballet me akuzën për “Shitje të paautorizuar të armëve” pasi shiti armën që u përdor në këtë krim.
Sipas raportit të autopsisë, vdekja e Liridonës erdhi si pasojë e gjakderdhjes së brendshme dhe të jashtme, ndërsa ngjarja tronditi opinionin publik për shkak të brutalitetit dhe planifikimit të detajuar të krimit.
