Këngëtarja Fjolla Morina, e cila një ditë më parë u arrestua pikërisht në pikën doganore të cilën ka për mbiemër, ka pranuar në policinë e Kukësit se arma në çantë ishte e saj.
Pistoleta tip “Zoraki” dhe 23 fishekë, nga deponimi duket se i përket këngëtares VIP e cila ndër të tjera lëvizte edhe e armatosur.
“Unë i ndërroj shpesh çantat dhe armën e kisha vënë disa kohë më parë, pikërisht në çantë. E kam harruar aty, dhe sot e mora çantën pa ditur që pistoleta ishte ende aty brenda dhe udhëtova drejt Shqipërisë”,- është shprehur ajo para oficerëve të policisë.
Këngëtarja nga Kosova, Fjolla Morina, u arrestua mesditën e djeshme pasi në çantën e dorës iu gjet një armë zjarri tip pistoletë me 23 fishekë.
Këngëtarja u kap në vijën e dytë të kontrollit në Morinë, teksa po udhëtonte me një makinë “Audi Q7”, që siç pretendon është dhuratë e të dashurit të saj.
Policia sekuestroi edhe një pistoletë lodër, si dhe ka arrestuar edhe dy personat e tjerë, të cilët po udhëtonin me të, përkatësisht F.M., 29 vjeç dhe F.S., 29 vjeç.
Pas arrestimit këngëtarja përfundoi në spital për shkak se, nuk po ndihej mirë.
Kujtojmë që Fjolla Morina, është një nga këngëtaret që ka tërhequr gjithmonë vëmendjen e medieve rozë për jetën luksoze dhe videoklipet e shtrenjta.
Madje, shumë herë ajo është shfaqur në videoklipe edhe me armë zjarri, apo veshje tejet ekstravagante.
Fjolla Morina ndër të tjera, është edhe shumë aktive në rrjetet sociale. Para 4 ditësh ajo na tregoi se i dashuri i saj i dhuroi një makinë luksoze “Audi Q7” (mjeti me të cilën u kap në Morinë).
Nuk dihet ende emri i të dashurit të ri që i dhuroi këngëtares këtë makinë luksoze, pasi kjo e fundit ka qenë shumë e rezervuar për sa i përket jetës së saj personale.
Por, pas arrestimit shumë nga ndjekësit e saj e kanë kritikuar atë.
Më poshtë, “GazetaReforma.com” ju sjell disa foto, që tregojnë jetën mjaft luksoze të këngëtares.
/GazetaReforma.com/
