Nikos Dendias, ministri i Jashtëm i Greqisë do të kërkojë nesër në Tiranë zgjerimin e kufirit detar me që milje. Sipas deklaratës së tij, të cituar nga mediat greke të shtunën, ai vjen të bisedojë për detin territorial të Greqisë në Jon.
“Pas dy marrëveshjeve me Italinë dhe Egjiptin, ka ardhur momenti i duhur që Greqia të ndërmarrë hapa të mëtejshëm për shtrirjen e ujërave territoriale të Greqisë në 12 milje, fillimisht në detin Jon, si dhe në vijim do kryhen përgatitjet për zgjerimin në zonat e tjera,” citohet Dendias, nga mediat greke
Axhenda
Ai mbërrin rreth orës 11:00 në Tiranë. Fillimisht ai do të takohet me homologun e tij Gent Cakajn në Ministrinë e Jashtme, më pas do të shkojë në Kryeministri, ku do të ketë edhe një konferencë me Ramën. Gjithashtu pritet të ketë edhe një takim me Presidentin Meta. Në qendër të diskutimeve do të jetë çështja e zgjidhjes së kufijve detarë dhe përcaktimi i Zonës Ekonomike Ekskluzive në detin Jon.
Ministri i Jashtëm grek Nikos Dendias përsëriti, të shtunën, se Greqia do të ushtrojë të drejtën e saj për të zgjeruar ujrat e saj territorial në detin Jon. Ai sqaroi se Greqia thjesht po ushtron ‘një të drejtë ekskluzive e të njohur për të gjitha vendet nga e Drejta Ndërkombëtare për Detin.’
Sipas tij, kjo e drejtë e secilit vend ‘nuk i nënshtrohet asnjë kufizimi ose miratimi nga palë të treta’.
Gjithashtu, Dendias komentoi dhe në lidhje me konfliktin me Turqinë. Ai i bëri thirrje homologëve të tij në BE të hartonin një listë me sanksionet e mundshme mbi Turqinë.
/GazetaReforma.com/
