Një defekt i dyfishtë në motorët e avionit dyshohet të jetë shkaku kryesor i aksidentit tragjik ajror që ndodhi javën e kaluar në Indi, ku një Boeing 787 Dreamliner i linjës “Air India” u rrëzua pak minuta pas ngritjes, duke shkaktuar vdekjen e të paktën 279 personave.
Avioni ishte nisur nga Ahmedabad drejt Londrës, por humbi kontrollin dhe u përplas me një godinë të një kolegji mjekësor, duke shkaktuar zjarr të madh që përfshiu ndërtesën dhe mbetjet e aeroplanit.
Hetuesit indianë po punojnë me ekipet nga SHBA, Britania dhe kompania “Boeing” për të zbuluar shkaqet e aksidentit.
Raportimet e para nga Wall Street Journal tregojnë se gjatë ngritjes, avioni mund të ketë punuar me sistemin emergjent të furnizimit me energji, të njohur si “ram air turbine”, që sugjeron se motorët nuk po funksiononin normalisht.
Sipas të dhënave, pilotët patën vetëm 17 sekonda për të reaguar pasi dy motorët humbën fuqinë në një lartësi prej 120 metrash.
Para përplasjes, pilotët bënë thirrjen e emergjencës “mayday”. Përveç hetimit të kutive të zeza, autoritetet po shqyrtojnë ngarkesën e avionit, trajnimet e ekuipazhit dhe gjendjen teknike të aeroplanit. Një raport paraprak pritet të publikohet brenda tre muajsh.
Si ndodhi aksidentit tragjik ajror në Indi?
Një aksident tragjik ajror goditi Indinë kur një avion Boeing 787 Dreamliner i kompanisë Air India, i nisur nga Ahmedabad për në Londër, u rrëzua vetëm pak sekonda pas ngritjes.
Nga ngjarja humbën jetën 279 persona, duke e bërë këtë një prej fatkeqësive më të mëdha ajrore të shekullit të 21-të. Trupat e viktimave janë dërguar për identifikim në spitalin lokal, proces që po rezulton i vështirë për shkak të dëmtimeve të shumta.
Vetëm një person shpëtoi, një britanik me origjinë indiane, i cili ishte në pjesën e përparme të avionit dhe po trajtohet aktualisht në spital.
Fluturimi me numër AI171 u nis nga pista në orën 13:19 me kohë lokale, por pilotët lëshuan menjëherë sinjal emergjence dhe humbën shpejt lartësinë. Avioni përfundoi mbi një kompleks banimi pranë aeroportit, ku jetonin mjekë, studentë të mjekësisë dhe familjet e tyre, duke shkaktuar shkatërrim të gjerë dhe zjarre të fuqishme.
Në bord ndodheshin 230 pasagjerë dhe 12 anëtarë ekuipazhi, përfshirë 169 indianë, 53 britanikë, 7 portugezë dhe një kanadez. Autoritetet kanë nisur një hetim të detajuar për të zbuluar shkaqet e rrëzimit, ndërsa është gjetur regjistruesi i të dhënave të fluturimit, ndërsa regjistruesi i zërit ende kërkohet.
Ministri i Brendshëm i Indisë, Amit Shah, bëri me dije se raporti përfundimtar nuk do të publikohet para përfundimit të analizave të ADN-së, të cilat janë të nevojshme për identifikimin e viktimave për shkak të dëmtimeve të rënda.
Ky aksident është një prej më tragjikëve në historinë e aviacionit civil modern, duke rikthyer në fokus sigurinë e fluturimeve dhe standardet e mirëmbajtjes së avionëve komercialë.
