Prokuroria e Durrësit ka dhënë detajet nga hetimet për arrestimet tek Autoriteti Rrugor Shqiptar në Durrës.
Nga njoftimi zyrtar i Prokurorisë, bëhet me dije se procedimi penal ka nisur nga fakti që në kilometrin e trete të rrugës nacionale “Plepa- Kavajë” kanë ndodhur një sërë aksidentesh, që kanë sjellë edhe vdekjen e disa personave.
Pikësisht në këtë zonë është identifikuar edhe pika e karburantit, e cila ka qënë në zonë në kundërshtim me ligjin. Pas identifikimit të shkeljes kanë nisur hetimet ndaj inxhinierëve specialistë të ARRSH-së: Agron Hasa, Kastriot Braha, Aferdita Basha e Dhurata Lazaj dhe anëtarëve të Këshillit Teknik; Spartak Tarkaj, Astrit Zenelaj dhe Leke Tushaj.
Të gjithë akuzohen për ‘shpërdorimi të detyrës’ dhe ‘dhënie të ndihmës për ndërtimin e paligjshëm’. Në përfundim të hetimeve, Prokuroria e Durrësit ka kërkuar arrestimin e tyre, operacion i cili është finalizuar ditën e sotme.
Mësohet se deri më tani janë prangosur: Agron Hasa, Kastriot Braha , Afërdita Basha, Dhurata Lazaj, Astrit Zenelaj, Spartak Tarka, Lek Tushaj, Rezart Arkaxhiu, Xhevat Vataksi. Megjithatë në njoftimin e Prokurorisë nuk është bërë me dije identiteti i biznesmenit që ka pasur në pronësi karburantin, i cili quhet Mustafa Koka.
NJOFTIMI I PLOTË:
Prokuroria pranë Gjykatës së Shkallës së Parë Durrës në kuadrin e hetimeve të gjithanshme që po kryen dhe sidomos në hetimin e veprave penale që kanë të bëjnë me shpërdorimin e detyrës dhe të tejkalimit të kompetencave që ligji i ka ngarkuar punonjësve të administratës shtetërore ka regjistruar çështjen penale për veprën penale ‘Shpërdorimi i detyrës’, parashikuar nga neni 248 i Kodit Penal si dhe për veprën penale të ‘Dhënia e ndihmës për ndërtimin e paligjshëm’, kryer në bashkëpunim, parashikuar nga nenet 199/b dhe 25 të Kodit Penal.
Faktet mbi të cilin është regjistruar ky procedim kanë të bëjnë me një sërë aksidentesh automobilistike që kanë ndodhur në rrugën nacionale Plepa Kavajë dhe konkretisht në kilometrin e tretë, ndodhet një pikë furnizimi me karburant, i cili dyshohet se është ndërtuar dhe ka marrë leje në kundërshtim me ligjin, Kodin Rrugor LIGJ 8387 /1998, i ndryshuar me Ligjin Nr.10 488, datë 5.12.2011 dhe VKM Nr.153 datë 07.04.2000 ‘Për miratimin e Rregullores në zbatim të Kodit Rrugor të Republikës së Shqipërisë’, e ndryshuar VKM Nr. 298, datë 8.4.2015.
Për këtë rast janë kryer hetime ndaj të dyshuarve Agron Hasa, Kastriot Braha, Aferdita Basha e Dhurata Lazaj si specialiste inxhiniere të ARSH, Spartak Tarkaj, Astrit Zenelaj, Leke Tushaj me cilësinë e drejtorëve të drejtorive të ARSh-së, anëtarë të Këshillit Teknik, të cilët kanë konsumuar elemente të figurës së veprës penale të ‘Shpërdorimi i detyrës’, parashikuar nga neni 248 i Kodit Penal dhe të veprës penale të ‘Dhënia e ndihmës për ndërtimin e paligjshëm’, kryer në bashkëpunim, parashikuar nga nenet 199/b dhe 25 të Kodit Penal.
Mbi bazen e këtyre fakteve Prokuroria pranë Gjykatës së Shkallës së Parë Durrës është drejtuar me kërkesë në Gjykatë për caktimin e masave të sigurimit ndaj tyre dhe me datë 14.10.2020 është bërë ekzekutimi i masave të sigurimit të caktuara ndaj shtetasve Agron Hasa, Kastriot Braha , Afërdita Basha, Dhurata Lazaj, Astrit Zenelaj, Spartak Tarka, Lek Tushaj, Rezart Arkaxhiu, Xhevat Vataksi.
Dhe një herë shprehim vendoshmërinë e Prokurorisë pranë Gjykatës së Shkallës së Parë Durrës për zbatimin me korrektësi të ligjit me qëllim vënien para përgjegjësisë penale të gjithë atyre punonjësve shtetëror të cilët në mënyrë të kundraligjshme përfitojëe nga funksioni që i është dhënë dhe nxjerrin përfitime materiale për të tretët ose për vete duke dëmtuar pasurinë shtetërore dhe duke sjellë pasoja të rënda për interesat e shtetit dhe të shtetasve në përgjithësi.
