Një përplasje e dhunshme ka ndodhur mbrëmjen e djeshme në një restorant në rrugën “Sami Frashëri”, në zonën e Liqenit Artificial në Tiranë, ku një sherr mes disa personave ka degraduar deri në përdorimin e armës së zjarrit.
Sipas informacioneve të para, në restorant ndodheshin shtatë persona të ulur në një tavolinë. Dy prej tyre janë konfliktuar fillimisht me fjalë, ndërsa më pas situata ka përshkallëzuar në përplasje fizike. Të pranishmit kanë përdorur edhe sende të forta, si karrige, ndërsa një prej tyre ka nxjerrë një armë zjarri dhe ka qëlluar.
Si pasojë e dhunës, një person ka mbetur i plagosur pasi është goditur disa herë me qytën e pistoletës. Ai është transportuar menjëherë në një spital privat në Tiranë. Ende nuk ka të dhëna zyrtare mbi identitetin apo gjendjen e tij shëndetësore.
Pas ngjarjes, personat e përfshirë janë larguar me shpejtësi nga vendi i ngjarjes me katër automjete të ndryshme, duke tentuar t’i shpëtojnë policisë.
Forcat e rendit mbërritën menjëherë në restorant, ku gjetën një gëzhojë dhe gjurmë gjaku në ambientet e brendshme. Po ashtu, është sekuestruar arma e zjarrit e llojit pistoletë, e cila dyshohet se i ka rënë autorit gjatë përplasjes fizike.
Arma është dërguar në laborator për ekspertizë, me qëllim identifikimin e shenjave të gishtave dhe ADN-së.
Burime nga hetimi paraprak bëjnë me dije se konflikti mund të ketë lindur për motive financiare, konkretisht për borxhe me fajde. Sherri ka nisur pasi njëri nga personat në tavolinë refuzoi t’i japë dorën një tjetri, shoqëruar me fyerje, çka më pas ka çuar në përleshje.
Policia ka shoqëruar disa nga personat e përfshirë, dhe mësohet se ka edhe të arrestuar lidhur me këtë ngjarje. Deri më tani, policia nuk ka publikuar ende një deklaratë zyrtare.
Hetimet vijojnë për zbardhjen e plotë të rrethanave dhe identifikimin e të gjithë personave të përfshirë.
