Policia e Durrësit ka vijuar këtë të mërkurë operacionin “Plazhi i Lirë”, duke ndërhyrë në zonën e Kallmit për të liruar hapësirat publike të zëna në mënyrë të paligjshme.
Sipas njoftimit zyrtar, gjatë kontrolleve u konstatuan tri zona në plazhin e kësaj lagjeje që ishin uzurpuar me çadra dhe shezlongë pa autorizim.
Në total, janë sekuestruar 70 komplete plazhi (çadra dhe shezlongë), ndërsa tre persona janë proceduar në gjendje të lirë për zaptim të hapësirave publike. Bëhet fjalë për shtetasit A. H., 61 vjeç, E. S., 36 vjeç dhe F. H., 64 vjeçe, të gjithë banues në Durrës.
Policia ka paralajmëruar se kontrollet do të intensifikohen përgjatë gjithë bregdetit për të siguruar akses të lirë për qytetarët dhe për të mbikëqyrur aktivitetet e subjekteve private gjatë sezonit turistik.
Qëllimi është të garantohet që hapësirat publike të mos përvetësohen në mënyrë të paligjshme dhe pushuesit të kenë akses të lirë në vijën bregdetare.
