Ambasadorja e Shteteve të Bashkuara të Amerikës, Yuri Kim ka mbërritur në SPAK ditën e sotme, ku do të takohet me Arben Krajën dhe me drejtoreshën e BKH-së, Aida Hajnaj.
Vizita në Prokurorinë e Posaçme kundër Korrupsionit dhe Krimit të Organizuar (SPAK) e diplomates amerikane bëhet për të prezantuar hetuesit e rinj të “FBI-së shqiptare”.
Ambasada e Shteteve të Bashkuara të Amerikës është investuar fuqishëm në reformën në drejtësi, duke ndjekur hap pas hapi implementimin e saj.
Zbarkimi në SPAK vjen një ditë pas vizitës së zyrtarit të lartë amerikan Philip Reeker në vendin tonë.
Kujtojmë se ndihmës Sekretari i Shtetit në Detyrë për Çështjet Evropiane dhe Euroaziatike, Ambasadori Philip T. Reeker zhvilloi ditën e sotme një vizitë zyrtare në Tiranë. Gjithashtu në këtë vizitë ai u takua me kryeministrin e vendit Edi Rama dhe kryetarin e Partisë Demokratike Lulzim Basha. Ndërsa ajo që ra në sy dhe bëri shumë përshtypje gjatë vizitës së zotit Reeker, ishte dhe mungesa e një takimi me presidentin Iir Meta. Një zëdhënës i ambasadës amerikane i tha Zërit të Amerikës se “për arsye të ndërtimit të agjendës, këtë herë nuk ishte i mundur një takim me presidentin e vendit Ilir Meta”. Ndërsa Tedi Blushi, zëdhënësi i Presidencës ka deklaruar se zyrtari i Departamentit Amerikan të Shtetit, Philip Reeker nuk ka kërkuar asnjëherë në mënyrë zyrtare që të zhvilloj një takim me Presidentin e Republikës, Ilir Meta.
