Ambasadorja e Shteteve të Bashkuara të Amerikës, Yuri Kim ka shkuar në Fushë Krujë ditën e sotme. Pas lajmërimeve të shumta që ka bërë ambasada e SHBA-ve dhe zyrtarëve të lartë të cilët do të ndjekin nga afër procesin e votimit dhe atë të numërimit, Kim ka vendosur të shkoj vetë ditën e sotme në Fushë Krujë, në një zonë afër Laçit , ku u regjistrua edhe një incident gjatë orëve të vona të natës së kaluar. Mësohet se ambasadorja Kim ka zhvilluar një takim me drejtues të Policisë lokale, por edhe me qytetarë të zonës, duke i udhëzuar ata që të votojnë me vullnetin e tyre të lirë pa u ndikuar nga asgjë dhe pa u imponuar nga askush.
Sot është dita e heshtjes zgjedhore. Vetë ambasada e SHBA-ve ka bërë me dije se do ta monitorojnë nga afër të gjithë procesin, ndërkohë që dita e zgjedhjeve është nesër dhe gjatë natës së djeshme u shënua incidenti i parë në këtë zonë.
Kujtojmë se më herët Yuri Kim zhvilloi një takim 40 minutësh me kryetarin e Partisë Demokratike, Lulzim Basha. Gjatë 48 orëve të fundit Kim ka zhvilluar takime në kudër të zgjedhjeve të 25 prillit edhe me Presidentin e republikës, Ilir meta dhe me kryeministrin aktual Edi Rama.
