Erisa Xhixho ka paralajmëruar ministrin e Brendshëm, Ervin Hoxha, për një kallëzim penal.
Ajo deklaroi se sot përfundon afati për përgjigjen e kërkesës për informacion mbi emrat e ofektivëve policor që morën përsipër arrestimin e presidentit të Partisë së Lirisë, Ilir Meta. Xhixho theksoi se me arrestimin e Metës synohej t’i dërgohej një mesazh opozitës që të heshte, por shtoi se një gjë e tillë nuk do të ndodhë.
“Ministri i Brendshëm, ndërsa unë dhe kolegët e mi ishim në Kuvend, urdhëroi FSNSH-në të ndërhynte dhe të rrethonte deputetët e opozitës. A ju dukem unë e rrezikshme?
Ministër i Brendshëm, ne ju kemi dërguar një letër për trajtimin denigrues ndaj ish-presidentit Meta, me urdhër të Edi Ramës. Ju mbani përgjegjësi për atë veprim të turpshëm ndaj një personi që nuk i është shmangur asnjëherë drejtësisë. Policet me maska duhej t’i komunikonin Metës vendimin e gjykatës, arsyen e arrestimit, të drejtat e tij kushtetuese dhe të drejtën për një avokat. Këto janë të drejta që u takojnë të gjithë qytetarëve. Ju i keni urdhëruar të kryejnë atë trajtim.
Nëse ende nuk e keni lexuar kërkesën, po ua kujtoj unë. Kërkojmë të dimë emrat e policëve të maskuar që pranuan të kryejnë këtë akt politik të stilit pengmarrje. Gjithashtu, duam të dimë kush ka dhënë urdhrin dhe ka udhëhequr këtë operacion kriminal. Sot është afati i fundit për këtë përgjigje.”
