Aeroporti ndërkombëtar “Flatrat e Veriut” në Kukës, tashmë i ka kaluar testimet dhe ditën e sotme kompania “WizzAir” uli avionët e saj. 4 destinacionet e para janë drejt Austrisë, Gjermanisë dhe Zvicrës. Ai ka zbritur sot nga avioni i parë i mbërritur në aeroport, i shoqëruar nga dy ministret Elisa Spiropali dhe Belinda Balluku.
Kryeministri Rama nga Kukësi u shpreh ditën e sotme se udhëtimet nga ky aeroport do të jenë me çmime të lira duke filluar nga 19 euro për destinacion.
Gjithashtu Rama tha se destinacioni më i rëndësishëm do të jetë Anglia. Ashtu si edhe herë të tjera kryeministri nuk iu “ndahet” çunave të Londrës duke iu premtuar se tashme tarifat e udhëtimit do të jenë simbolike.
“Destinacioni tjetër i rëndësishëm është Anglia. Unë nuk do I ndahem Kukësit derisa djemtë e Londrës nga Kukësi të kenë fluturimet e tyre me tarifa krejtësisht simbolike. Në fund fjalët i merr era dhe punët e mira mbeten. Jam besimplotë që ky aeroport ka një të ardhme fantastike. Dua ta falenderoj drejtorin për gatishmërinë për ta parë Kukësin si mundësi. Në fillim ishte pak skeptik. Sot është një ditë e bukur me diell dhe dëborë. Jam i kënaqur që sot jemi për t’i dhënë një mundësi të re banorëve jo vetëm të Kukësit por të një treve të tërë që përfshin edhe pjesën matanë bjeshkëve duke hapur 4 destinacione. Austri, Gjermani dhe Zvicër. Janë tre vende me katër destinacione dy herë në javë. Çmimet janë 19 euro për secilin destinacion. Sot mund të shohim si ka ndryshuar panorama e çmimeve falë reformave të bërë, u shpreh Rama.
