Një tjetër ngjarje e rëndë ka ndodhur në ambientet e gjimnazit “Siri Shapllo” në Gjirokastër.
Një 16-vjeçar, nxënës i vitit të dytë, është hedhur nga dritarja e katit të dytë të shkollës në rrethana që po hetohen.
I riu, me inicialet A.M., thuhet se ka ndërmarrë këtë akt pas një basti me shokët e klasës. Rënia i ka shkaktuar dëmtime serioze në gjymtyrë, ndërsa ndodhet nën kujdesin e mjekëve në spitalin rajonal.
Ngjarja ka ngritur pikëpyetje serioze mbi atmosferën dhe mbështetjen emocionale brenda shkollës, veçanërisht pasi ky është rasti i tretë i një akti të tillë brenda një periudhe tre mujore në të njëjtin institucion arsimor.
Më 20 prill, një tjetër nxënës i këtij gjimnazi, Vehip Peçi, 16 vjeç, u gjet i vetëvarur në banesën e tij. Familjarë dhe miq kanë treguar se ai po përjetonte vështirësi emocionale dhe kishte shfaqur sinjale ankthi dhe izolimi, të cilat nuk u trajtuan me seriozitetin e duhur.
Në dhomën e tij u gjetën letra ku kërkonte ndjesë ndaj familjes dhe mësuesve, një dëshmi e qartë e vuajtjes së brendshme që përjetonte.
Më herët, më 10 shkurt, një vajzë 17-vjeçare, Irsa Muçollari, gjithashtu nxënëse e gjimnazit “Siri Shapllo”, u vetëvra në banesën e saj në lagjen “18 Shtatori”. Prindërit e saj kanë pohuar se ajo ishte viktimë e bullizmit të vazhdueshëm nga shokët e klasës dhe mësues të caktuar, gjë që kishte ndikuar rëndë në gjendjen e saj psikologjike.
Këto ngjarje tragjike, të ndodhura në një periudhë të shkurtër kohore dhe në të njëjtin institucion arsimor, flasin për një krizë të thellë sociale dhe institucionale.
Ndërkohë që autoritetet lokale arsimore dhe policore janë duke hetuar rrethanat, vërehet një heshtje e frikshme nga ana e drejtuesve të shkollës dhe të Zyrës Arsimore të Gjirokastrës, të cilët nuk kanë bërë ende asnjë deklaratë publike.
