Gjykata e Tiranës ka dënuar me burgim të përjetshëm Roland Pulën për vrasjen e vëllezërve Bardhi në fshatin Gramëz të Krujës në vitin 2020.
Ngjarja ndodhi pasi viktimat plagosën vëllanë e autorit.
Vëllezërit Gramoz dhe Xhentil Bardhi u qëlluan me kallashnikov, duke humbur jetën gjatë transportit për në spital.
“Gjykata e Shkallës së Parë e Juridiksionit të Përgjithshëm Tiranë në datë 21.11.2024 e përbërë me Trup Gjykues: Kryesues Gjyqtare znj. Suela Lika, anëtarë: Gjyqtar z. Kujtim Vraniçi dhe Gjyqtare znj. Enkeleda Dalipi pasi shqyrtuan çështjen vendosi:
Deklarimin fajtor të të pandehurit R.P.,për kryerjen e veprave penale “ vrasje në rrethana të tjera cilësuese” dhe “ Prodhimi dhe mbajtja pa leje e armëve, armëve shpërthyese dhe municionit” parashikuar nga nenet 79/dh dhe 278/1 të Kodit Penal dhe dënimin e tij përfundimisht me burgim të përjetshëm”, thuhet në njoftim.
Krimi i rëndë ndodhi pas një konflikti që nisi në një lokal të fshatit, ku autori, Roland Pula, u zuri pritë dy vëllezërve pranë shtëpisë së tyre dhe i qëlloi me breshëri armësh në errësirë.
Ngjarja tragjike u konsiderua vijim i një konflikti të hershëm, i cili daton që në 19 gusht 2005, kur vëllai i viktimave, Elton Bardhi, plagosi me thikë Besnik Pulën.
Roland Pula ishte arrestuar më 2008 dhe më 29 tetor 2010 u dënua me disa masa burgimi: 6 muaj për akuzën e “kanosjes” me armë, 4 muaj për “plagosje të lehtë me dashje” dhe 2 vjet për “mbajtje pa leje të armëve luftarake”.
