Prokuroria e Tiranës ka kërkuar dënim me burgim të përjetshëm për Arsen Muskurtin, i cili në gusht të vitit 2022 vrau me armë zjarri vëllain e tij, Dritan Muskurti, dhe bashkëshorten e tij, Norën, brenda agjencisë së udhëtimeve “Nora Tours” në Tiranë.
Sipas hetimeve, Muskurti hyri në ambientet e biznesit duke mbajtur një armë në dorë dhe qëlloi për vdekje dy personat.
Nga deklarimet e tij rezulton se motivi i vrasjes ishte konflikti i gjatë dhe i pazgjidhur mes tij dhe të vëllait, të cilin e akuzonte për shantazh ndaj tij dhe prindërve.
Ndërkohë që mosmarrëveshjet mes dy vëllezërve vazhdonin prej kohësh, ata kishin shkuar edhe në gjykatë për të zgjidhur çështjen, por pa sukses, gjë që përfundoi në këtë akt të rëndë.
Si ndodhi ngjarja?
Ngjarja ndodhi pasi fillimisht Arsen Muskurti debatoi me Dritanin dhe Norën në ambientet e agjencisë së tyre të udhëtimeve. Ai nxori armën dhe qëlloi pesë herë, duke i marrë jetën viktimave në vend. Pas arrestimit, rreth dy orë më vonë, ai tentoi të mashtrojë hetuesit duke i çuar në një vend të gabuar për të gjetur armën e krimit. Megjithatë, njëra nga dy gratë e tij rrëfeu se ku ishte fshehur pistoleta, duke i dhënë hetuesve kodin e kasafortës pak metra larg agjencisë.
Gjithashtu, u zbulua se Arsen Muskurti i kishte viktimës një borxh prej 150 mijë eurosh, për të cilin kishte nisur edhe një proces gjyqësor. Konflikti mes vëllezërve u thellua edhe më shumë pas një fletëthirrjeje gjyqësore që Dritani kishte bërë katër ditë para ngjarjes, ku kërkonte urdhër mbrojtjeje për veten dhe bashkëshorten. Pak kohë pas kësaj, Arsen Muskurti shkoi në agjencinë e vëllait dhe kreu aktin fatal.
Në përfundim të hetimeve, Prokuroria ka kërkuar që ai të dënohet me burgim të përjetshëm për veprën penale “Vrasje për shkak të marrëdhënieve familjare”.
