Gerd Gjinarari i akuzuar për vrasjen e shtetasit Naim Zyberi në vitin 1997, dhe që ishte i dënuar me burgim të përjetshëm është liruar nga burgu.
Zyberi është kuksiani i njohur si i forti i Tiranës dhe në 1997, Gjinarari sëbashku me Arben Grorin e qëlluan për vdekje.
Vrasja e këtij të fundit kishte lidhje me histori të vjetra hakmarrjesh, të cilat zanafillën e kishin në Tiranë, ku “bandat” e të fortëve kishin pasur përplasje të shumta mes tyre.
Kuksiani që jetonte në zonën e “Frigoriferit” në kryeqytet, Naim Zyberi pas vrasjes së Gaz Muçës, dyshohej se kishte vrarë pranë banesës së tij edhe Artur G., vëllanë e Arbenit dhe pas kësaj ai nuk do të mund t’i shpëtonte dot as bandës së rrugës “Bardhyl”, emri më i njohur i të cilës ishte Gaz Muça, por as zemërimit të Arben G.
Zyberi më pas do të largohej drejt Italisë, por edhe atje atë do ta përndiqte vrasja e Muçës dhe G.. Kuksiani ndiqet në Itali dhe atentati i parë ndaj tij u bë në një bar në Torino, ku Zyberi plagoset dhe vriten dy shokët e tij.
Megjithatë hakmarrja nuk kishte marrë fund akoma dhe gjatë kohës që “i forti” i rrugës së “Frigoriferit” në Tiranë kurohej në një spital në Milano, Arben G., bashkë me shokun e tij, Gert Gjeneralin hynë në spital dhe e vranë Zyberin.
Vendimi i Gjykatës:
Gjykata e Korçës ka vendosur lirimin nga qelia të Gerd Gjinararit. Gjykata e Korçës kryesuar nga kryetari Markelian Kuqo ka vendosur të pranojë kërkesën e Gjinararit për lirim me kusht, një vendim i marrë më 14 shkurt të këtij viti.
Pse u mor ky vendim?
Një nga shkaqet e lirimit është normalizimi i marrëdhënieve me trashëgimtarët e viktimës, Naim Zyberi. Gjithashtu sjellja e tij është pasqyruar si shembullore dhe ka respektuar rregullat e burgut.
