Një ngjarje e rëndë ndodhi disa ditë më parë në Vlorë ku 25-vjeçari Xhuljan Bullari u gjet pa shenja jete brenda një automjeti.
Autoritetet e Policisë kanë bërë të mundur arrestimin e Bledar Selmanaj, i cili dyshohet të jetë autor i vrasjes së 25-vjeçarit.
Vetëm dy ditë pas ngjarjes së rëndë, ku kishte vrarë shokun e tij, Selmanaj ndante shkrime të ndryshme në rrjete sociale ku shkruante se ishte biznesmen, madje jepte dhe të dhëna të tjera si për shembull se ishte serioz dhe i gjatë 1.75.
Kujtojmë se për motive të dobëta, 39-vjeçari e qëlloi në kokë të riun natën e 20 gushtit duke e lënë të vrarë brenda në makinë, ndërsa trupi i tij u gjet mëngjesin e 21 gushtit. Menjëherë pas krimit, Selmanaj e groposi armën e vrasjes teksa kishte fshehur dhe veshjet që përdori ditën e atentatit.
Pas hetimeve nga ana e grupit hetimor, pasi u mor aparati celular i 25-vjeçarit, nga ku u nxorën edhe kontaktet, policia bëri një listë me miqtë e familjarët e viktimës. Menjëherë lindën dyshimet se vrasësi ishte i njohur me Bullarin dhe rezultoi se Bledar Selmanaj ishte pasagjer në automjetin e drejtuar nga 25-vjeçari, madje kishin udhëtuar bashkë.
Selmanaj nuk është një emër i panjohur për drejtësinë shqiptare. Vite më parë ai ka qenë i akuzuar për disa vjedhje argjendarish e banesash në Tiranë. Duke kryer disa vjedhje seri ai është etiketuar edhe si hajduti ‘serial’ në kryeqytet.
