Gjyqtarja dhe prokurori i çështjes për vrasjen e Martin Canit kanë mbërritur mëngjesin e sotëm në një spital privat në Tiranë, ku po merr ndihmë mjekësore 14-vjeçari Mario Perlleshaj, i dyshuar si autor i krimit. I mituri ka pësuar lëndime gjatë një konflikti me bashkëmoshatarin e tij më 18 nëntor.
Sot (22 nëntor), në këtë spital do të zhvillohet seanca për vlerësimin dhe caktimin e masës së sigurimit ndaj të miturit, i cili ka qenë i shtruar që nga dita e ngjarjes. Perlleshaj goditi Martin Canin me thikë në zemër pas një sherri mes tyre, disa metra larg shkollës “Fan Noli”.
I mituri është arrestuar dhe akuzohet për “Vrasje me dashje ndaj të miturit” dhe “Prodhimi, mbajtja, blerja apo shitja pa leje e armëve të ftohta”.
Dje, në kryeqytet u zhvillua një protestë nga prindër të nxënësve, të shoqëruar me fëmijët e tyre, për të shprehur shqetësimin ndaj dhunës. Gjatë protestës, ata lanë shenja të kuqe në muret e Ministrisë së Arsimit, si simbol të gjakut dhe dhunës që ndodhi.
