Gjykata e Korçës ka dhënë masën “arrest me burg” ndaj 42-vjeçarit Zamir Topi, i cili vrau me sëpatë bashkëfshatarin e tij, 50-vjeçarin, Dashnor Osmani.
Zamir Topi, u arrestua 3 ditë me pare, pak metra nga vendngjarja, në afërsi të ‘Pazarit të Vjetër’ ku ndodhi edhe krimi makabër.
Në sallën e gjyqit, Zamir Topi ka refuzuar t’u përgjigjet pyetjeve.
Megjithatë, ishte dëshmia e tij ajo që hodhi dritë mbi ngjarjen e rëndë. 42-vjeçari i lidhi arsyet që e kishin çuar në kryerjen e kësaj vrasje të rëndë, me një konflikt të vjetër për një vend në varreza.
Dashnor Osmani kishte varrosur të atin pranë varrit të nënës së autorit të krimit, ndërkohë që të dy ishin prej 5 vitesh në këtë konflikt, duke mos arritur asnjëherë dakortësi për zhvendosjen e eshtrave të të atit të viktimës larg varrit tjetër.
Menjëherë pas ngjarjes, burime nga qendra e shëndetit mendor bënë të ditur se, Zamir Topi është person me probleme mendore, gjë që mund edhe të jetë bërë shkas për këtë krim horror.
