Gjykata ka vendosur masën e sigurisë “arrest me burg” për Elton Metajn, i cili vrau ish-bashkëshorten e tij 23-vjeçare, Sabrina Bengaj në Zhupan të Fierit disa ditë më parë. Ndaj tij rëndon akuza për veprën penale “vrasje për shkak të marrëdhënieve familjare”.
Metaj e ka pranuar krimin gjatë seancës, ndërsa mësohet të ketë deklaruar se ish-vjehrri e kërcënonte dhe i thoshte se do e vriste, prandaj armën e kishte blerë për vetëmbrojtje. Gjatë seancës ai ka qarë disa herë dhe ka thënë se e donte Savrinën, por ishte nën presion nga ish-vjehrri.
Ngjarja tragjike ndodhi në orët e vona të mbrëmjes të së premtes, kur Elton Metaj vrau ish-bashkëshorten sabrina Bengaj, në shtëpinë e prindërve të saj. Metaj u arrestua disa orë pas krimit të rëndë dhe u kap nga policia në një zonë të pyllëzuar në fshatin Peshtan.
Prindërit e 23-vjeçares kanë treguar më vonë për mediat se ajo dhe Metaj kishin vazhdimisht probleme dhe ky i fundit e dhunonte sistematikisht.
Ndërkohë, Sabrina Bengaj kishte një urdhër mbrojtje nga gjykata, por pavarësisht kësaj, Elton Metaj iu afrua banesës dhe e vrau pas shpine. Ai ishte liruar nga burgu në korrik të këtij viti, pasi ishte arrestuar rreth një vit më parë, kur mbajti peng Sabrina Bengajn dhe familjen e saj nën kërcënimin e armës.
