Detaje të reja janë zbuluar në lidhje me ngjarjen e rëndë që tronditi Shkodrën ditën e djeshme, aty ku Fadil Bandulla ka qëlluar me armë zjarri bashkëshorten e tij Sanije Bandulla, 83 vjeçe.
Sipas informacioneve të marra çifti ka pasur konflikte prej kohësh me njëri-tjetrin, ku rasti më i fundit ka qenë fundjavën e kaluar.
Bëhet me dije se 5 ditë më parë, Sanije Bandulla është paraqitur në urgjencën e spitalit rajonal të Shkodrës, me lëndime të shumta për shkak të dhunës nga bashkëshorti. Ngjarjen e rëndë ajo e ka rrëfyer edhe përpara patrullës së policisë në spital ku dhe ka kërkuar ndihëmë nga uniformat blu.
Ndihmë kjo e cila siç duket dhe nga rrethanat e ndodhura nuk erdhi kurrë nga ana e policisë së Shtetit. Raportohet gjithashtu se 83-vjeçarja po planifikonte largimin nga shtëpia dhe kalimin e saj në azilin e pleqve për shkak të dhunës në familje që merrte herë pas herë nga bashkëshorti i saj.
Kujtojmë se krimi i rëndë ndodhi lagjen “Ahmet Haxhija” ne afërsi të stadiumit “Loro Boriçi”, ku Fadili pasi ekzekutoi gruan me kallash, vrau edhe veten.
Ndërkohë ngjarja dyshohet se ka ndodhur pasditen e së dielës, pasi komshinjtë kanë dëgjuar të shtënat me arme zjarri por policia nuk ka arritur ti identifikoje. Kanë qenë fqinjët ata që sërish kanë bërë denoncimin në polici pasi nuk i kishin parë të moshuarit prej 3 ditësh. Pas kontrolleve te uniformave blu në banesën e çiftit, u gjetën edhe trupat e pajete si dhe u sekuestrua arma e përdorur tip kallashanikov.
