Ditën e sotme Gjykata e Tiranës ka dhënë vendimin në lidhje me masën e sigurisë për Alban Menerin, i cili dyshohet qëlloi për vdekje fqinjin e tij pas një sherri për motive të dobta. Gjykata ka vendosur ta lërë në arrest me burg Menerin. Përballë gjykatësve, mësohet se 51-vjeçari nuk e ka mohuar konfliktin që ka pasur me viktimën, por ka mbrojtur veten duke u shprehur se ai ka qenë në gjendje të dehur gjatë momentit të konfliktit me viktimën.
Kujtojmë që konflikti mes palëve nisi për motive krejt banale, pasi autori Alban Meneri ka qenë duke u konfliktuar me një grua poshtë pallatit për parkimin e makinës, ku në moment ka ndërhyrë viktima, gjë e cila duket se e ka acaruar Menerin. Një prej zonjave që jetonte në të njëjtin pallat qoftë me viktimën por edhe me autorin, ka treguar se Meneri ka pasur konflikte të vazhdueshme me banorët e lagjes. Ai pretendonte pronësinë e një hapësire që përdorej për parkim nga ana e banorëve.
Zonja tregoi se familja e Stakës jetonte jashtë vendit, dhe ai është gjetur i pajetë nga kujdestarja, e cila kishte mbërritur në banesë mëngjesin e të nesërmes.
Meneri punonte si teknik pranë Radio Televizionit Shqiptar.
