Gjykata e Lartë ka refuzuar rekursin e paraqitur nga Ruhan Hiraj, anëtar i grupit të strukturuar kriminal “Grupi i Zjarrit.”
Hiraj ishte dënuar nga Apeli i Posaçëm me 15 vite burg për vrasjen e efektivit të RENEA-s, Ibrahim Basha, ngjarje që ndodhi 9 vjet më parë.
Trupa gjyqësore, e kryesuar nga Ilir Panda dhe e përbërë nga Albana Boksi dhe Sandër Simoni, nuk pranoi kërkesën e Hirajt për rishikimin e vendimit të dhënë më 18 shkurt 2021 nga Apeli i Posaçëm.
Ngjarja e vitit 2015 ndodhi në Lazarat, ku efektivi i RENEA-s, Ibrahim Basha, u qëllua dhe humbi jetën gjatë një operacioni antidrogë. Dy kolegët e tij, Jetmir Isaj dhe Perlat Shpati, mbetën të plagosur.
Gjatë atij operacioni, një automjet i mbushur me lëndë narkotike dhe armë u përplas me policinë. Pas ndalimit të shoferit Xhulio Malo, u dëgjuan breshëri plumbash nga një distancë e largët, njëri prej të cilëve goditi Ibrahim Bashën në kokë, duke i shkaktuar vdekjen.
Për këtë ngjarje, policia identifikoi 21 persona të dyshuar, ndërsa prokuroria çoi për gjykim vetëm 11 prej tyre. Pas procesit gjyqësor, dy të akuzuar u dënuan me burg të përjetshëm, ndërsa të tjerët u dënuan gjithsej me 148 vite burg.
Ruhan Hiraj akuzohet për një sërë veprash penale, përfshirë “Kundërshtimin e punonjësit të Policisë së Rendit Publik me dhunë”, “Mbajtjen pa leje dhe prodhimin e armëve dhe municioneve”, “Prodhimin e armëve luftarake”, “Pjesëmarrjen në grup të strukturuar kriminal” dhe “Pjesëmarrjen në bandë të armatosur.” Hiraj u ekstradua nga Shtetet e Bashkuara të Amerikës, pas largimit të tij nga Shqipëria pas ngjarjes.
