48-vjeçarja Elvira Tahiraj, e cila vrau bashkëshortin e saj, N. Tahiraj, 55 vjeç, me sopatë, doli këtë të enjte para Gjykatës së Sarandës.
Gjykata vendosi të vlerësojë të ligjshëm arrestimin e saj dhe caktoi masën e sigurisë “shtrim i përkohshëm në një spital psikiatrik,” për akuzën “vrasja për shkak të marrëdhënieve familjare.”
Ngjarja ndodhi në orët e para të së martës, rreth orës 4 të mëngjesit, në banesën e çiftit në Metoq, Sarandë.
Viktima dyshohet se ishte në gjumë kur u godit për vdekje nga bashkëshortja e tij. Çifti ishin prindër të tre vajzave.
Vajza e vogël, që ndodhej në një dhomë tjetër gjatë krimit, njoftoi policinë pas ngjarjes.
Fqinjët e përshkruajnë viktimën si një njeri të qetë dhe punëtor, ndërsa për Elvira Tahirajn thonë se kishte probleme të shëndetit mendor dhe shfaqte sjellje të çuditshme.
Familja, me origjinë nga Kolonja, jetonte prej disa vitesh me qira dhe kishte të ardhura të pakta, pasi viktima ishte i vetmi që punonte.
Në seancën gjyqësore, 48-vjeçarja u mbrojt nga një avokate e caktuar nga shteti.
