Prej muajsh vendi jonë po tronditet nga krimet për larje hesapesh e deri tek ato brenda familjes. Situata e rënduar e rendit dhe e sigurisë ka detyruar drejtorin e Përgjithshëm të Policisë, Ardi Veliu të mbledhë ditën e sotme në Tiranë, drejtorët e Policisë në 12 qarqet e Shqipërisë dhe shefat e komisariateve. Bëhet e ditur se mbledhja do të zhvillohet në ambientet e Drejtorisë së Përgjithshme të Policisë së Shtetit.
Kujtojmë se vetëm një ditë më parë në vendin tonë u shënua një vrasje për motive banale në qytetin e Peqinit ku mbeti i vrarë Ylber Xhahysa. Po ashtu edh enjë krim në familje tronditi vendin ku burri vrau gruan e tij me sëpatë edhe më pas vari veten. Një tjetër ngjarje shokoi opinionin publik ku në lagjen ”Ndoc Mazi”, në qytetin e Shkodrës ku Fabian Vuka vrau me armë zjarri motrën e tij, Diana Vuka e cila sapo ishte kthyer nga Italia. Një tjetër krim brenda familjes ndodhi edhe disa ditë më parë në një lokal afër gjykatës së Tiranës ku ish-vjehrri Mexhit Picari, vrau me armë zjarri ish-dhëndrin e tij Kudret Saliaj dhe plagosi avokatin e tij. Këto ishin disa nga rastet e vrasjeve brenda familjes që tronditën opinionin publik ditët e fundit. Në pesë muaj e parë të vitit 2021, numërohen 27 viktima nga ngjarjet kriminale, përfshirë këtu atentate mafioze, vrasje pas konflikteve të çastit dhe krim në familje.
