Operacioni Forca e Ligjit ka zbuluar 4 të shënjestruarit e radhës. Në një njoftim për shtyp Policia e Shtetit njofton se OFL u ka kërkuar gjatë ditës së sotme justifikimin e pasurisë 4 personave të cilët janë dënuar për veprat penale të “Trafikut të narkotikëve” dhe “Vrasjes me paramendim”.
Ata janë: Arian Begaj, Ermal Lusha, Poliksen Muçollari, Eduart Sallaku, te cilet brenda 48 orëve do të duhet të justifikojnë të ardhurat mbi pasurinë që posedojnë.
Njoftimi i plotë
Në zbatim të detyrave të përcaktuara në Aktin Normativ të datës 31 janar 2020, vijon pa ndërprerë Operacioni Forca e Ligjit.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
A. B., banues në Kavajë, i dënuar për veprën penale “Trafikimi i narkotikëve”;
E. L., banues në Kavajë, i dënuar për veprën penale “Trafikimi i narkotikëve”;
P. M., banues në Tiranë, i dënuar për veprën penale “Vrasja me dashje, në lidhje me një krim tjetër”;
E. S., banues në Tiranë, i dënuar për veprën penale “Trafikimi i narkotikëve” në formën e grupit të strukturuar kriminal;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
