Gjykata e Vlorës ka dënuar me 10 vite burg Teslivan Basho, ose Tesi Basho, i cili konsiderohet ndryshe edhe i ‘forti i Selenicës’.
Mësohet se anëtari i bandës së Llanajve, Basho akuzohet për “Mbajtjes pa leje të armëve”, “Prodhim dhe shitje të lëndëve narkotike”, “Falsifikim të pasaportës” si dhe “Kultivim të lëndëve narkotike”.
Kush është i forti i Selenciës, Tesilvan Basho
Tesilvan Basho i njohur si i ‘forti i Selenicës’ dhe anëtar i bandës së Llanajve, së bashku me vëllain e tij, Satilno u arrestuan gati një vit më parë pas një operacioni të policisë në Selenicë.
Tesilvan Basho, i cili u kap në një bilardo, pritet të ekstradohet në Itali, pasi është dënuar për vrasjen e dy prostitutave dhe një çifti rumun në shtetin fqinj.
Basho njihej si anëtar i bandës së Llanajve. Ai është dënuar me burgim të përjetshëm në Itali, ndërsa njihet edhe për arratisjen spektakolare nga burgu italian, nëpërmjet përdorimit të çarçafëve dhe shkopave të fshesës.
Basho akuzohet në Itali për vrasje, kanosje dhe për përfshirje në shitje të lëndëve narkotike.
Më datë 24 janar të vitit 2008, Tesilvan Basho, kur ishte vetëm 27 vjeç vrau një çift rumun, Ramona Nicoara dhe Valentin Dascalu. Viktimat ishin të fejuar me njëri-tjetrin dhe u ekzekutuan me 11 plumba nga i rrezikshmi i Selenicës Tesilvan Basho. Pas kësaj ngjarje Tesi u largua nga Italia për në Amsterdam ku dhe u arrestua.
Pas arrestimit ai u esktradua në Itali dhe u njoh me akuzën e vrasjes. Basho ka vrarë me armë zjarri edhe dy vajza të tjera të cilat ushtronin prostitucion. Njërën prej tyre vetë Tesi Basho e ka përdorur si prostitutë.
Në vitin 2016, Gjykata e Torinos, e dënoi Bashon me burgim të përjetshëm për veprat penale të vrasjes, shfrytëzim prostitucioni, mbajtja dhe transportimi pa leje i armëve të zjarrit. Por pa kaluar shumë muaj, vetëm pak muaj më vonë, Basho u arratis si nëpër filma bashkë me dy të dënuar të tjerë.
Bashkë me Ilir Peren dhe Mikel Hasanbellin, të dy shqiptarë të rrezikshëm, Tesi Basho sharroi hekurat e dritares së qelisë dhe priti për momentin e duhur.
Sapo gjetën hapësirë, Tesi bashkë me dy miqtë e tij, lidhën çarçafë njëri pas tjetrit dhe zbritën në tokë. Më pas për tre vite Basho ka qëndruar në Shqipëri, teksa lëvizte i lirë dhe me makina të blinduara.
Pas një operacioni të policisë ai u arrestua së bashku me vëllanë e tij brenda një bilardoje më 16 tetor të vitit të kaluar.
