Kanë dalë në dritë detaje të reja nga krimi që tronditi vendin ditën e djeshme. Mësohet se 26-vjeçari Klinton Pira jetonte prej disa vitesh në zonën e Don Boskos në Tiranë, ku ishte zhvendosur nga Dibra. 3 vitet e fundit ai kishte emigruar në Angli në mënyrë të paligjshme.
Ai dhe 31-vjeçarja ganeze e kishin nisur historinë e dashurisë nga një njhohje në internet dhe nga postimet e tij në rrjetet sociale, duket se kishin një lidhje solide. Ndër të tjera bëhet e ditur se lidhja e tyre pritej të finalizohej në martesë.
Megjithatë, distanca mes tyre, duke qenë se Pira jetonte në Tiranë dhe Jaboah në Francë, ishte bërë shkak i xhelozisë dhe debateve të shumta. I riu ishte deportuar në Tiranë, ndërsa 31-vjeçarja kishte vendosur ditën e djeshme të vinte për të sqaruar konfliktet mes tyre. Ata janë takuar në banesën e marrë me qira ditore në rrugën Pjetër Budi, por debati ka degraduar deri në ngjarjen tragjike. 26-vjeçari e ka goditur disa herë me thikë në gjoks të dashurën e tij, e cila ka zbritur për të kërkuar ndihmë, por më pas ka gjetur vdekjen në spital. Ndërkohë, i riu u hodh nga kati i tetë, duke gjetur vdekjen në vend.
Por tragjedia në familjen e Klinton Pirës ka filluar disa vite më parë, kur i ati është gjetur i vetëvarur në një pemë,në një fshat të Bilishtit. Në atë kohë i riu ndodhej në Angli, ndërsa vdekjen e të atit e kishte përjetuar dramatikisht. Vdekja e tij u konsiderua si vetëvrasje,por familjarët kishin deklaruar në Polici dyshimet e tyre për vrasje, për shkak të hasmërisë së vjetër që kishin me një familje, po nga Dibra.
