Një ngjarje e rëndë ka tronditur mbrëmjen e sotme qytetin e Shkodrës, ku 34-vjeçari Kristjan Kola u ekzekutua me armë zjarri. Vrasja ndodhi rreth orës 22:30, në lagjen “Vasil Shanto”, pranë kinemasë “Republika”, në afërsi të qendrës së qytetit.
Sipas informacioneve, autorët ishin dy persona që lëviznin me motor dhe qëlluan drejt Kolës teksa ai ndodhej në ambientet e jashtme të një lokali. Pas krimit, ata u larguan me shpejtësi, ndërsa identitetet e tyre ende nuk janë zbuluar.
Policia reagoi menjëherë duke shkuar në vendngjarje dhe ngritur pika kontrolli në hyrje-daljet e qytetit, si dhe duke kryer kontrolle të imta në zona të ndryshme për të bërë të mundur kapjen e autorëve.
Në njoftimin zyrtar, Policia e Shkodrës thekson:
“Rreth orës 22:30, në lagjen ‘Vasil Shanto’, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali. Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve. Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve.”
Ngjarja ka shkaktuar pasiguri dhe tension në qytet, ndërsa hetimet po vijojnë për zbardhjen e plotë të saj dhe kapjen e ekzekutorëve.
