Gazetari Igli Çelmeta, i ftuar në emisionin NOW, ka dhënë detaje të reja mbi vrasjen e 50-vjeçarit Alfred Dedja, që ndodhi të dielën në një lokal në Ndroq.
Ai ka zbuluar se viktima dhe autori i dyshuar, Julian Gjoshi, ishin njohur prej shumë vitesh, dhe që Dedja e kishte rritur atë pasi ai kishte punuar në biznesin e familjes Hajri. Sipas gazetarit, ngjarja duket më shumë si një sherr banal, dhe nuk ka tiparet e një atentati të organizuar.
Çelmeta ka theksuar se Dedja kishte pasur precedentë penalë për çështje droge në Itali dhe se kishte punuar në kompleksin “Golden” të familjes Hajri, por nuk ishte regjistruar si punonjës.
Ai gjithashtu ka treguar se Gjoshi, vëllai i gruas së Altin Hajrit, ishte takuar shpesh me Dedjan dhe se ngjarja e vrasjes ka ndodhur pas një debati verbal mes dy të rinjve. Kur Dedja është afruar pranë tij, Gjoshi e ka qëlluar me pesë plumba, nga të cilët tre e kanë goditur.
Pas dorëzimit në polici, Gjoshi ka shfaqur shenja të çrregullimeve mendore dhe nuk ka qenë në gjendje të flasë për motivet e krimit. Sipas familjarëve, ai ishte rikthyer nga Spanja dhe kishte shfaqur probleme të shëndetit mendor kohët e fundit. Megjithatë, hetuesit po shqyrtojnë mundësinë që këto çrregullime të jenë përdorur si një justifikim për të shpëtuar nga ndjekja penale.
Gazetari Eni Ferhati ka shtuar se përdorimi i lëndëve narkotike mund të ketë ndikuar në çrregullimet e shëndetit mendor të autorit, por vetëm hetimet e mëtejshme dhe dëshmitë do të mund të zbardhin motivet e vërteta të krimit dhe të tregojnë nëse Gjoshi do të pranojë apo jo aktin e tij.
