Një ditë më parë Fieri u trondit nga grabitja dhe vrasja e 8-vjeçarit Mateo Vasiu nga Klodian Çalamani. Në lidhje me ngjarjen u arrestua nga Policia e Fierit, Klodian Çalamani, pasi 8-vjeçari është parë nga banorët e lagjes duke bërë xhiro me biçikletën e tij. Kjo ka hedhur dyshime tek policia, e cila menjëherë ka nisur hetimet
Ditën e sotme është bërë shoqërimi i trupit të pajetë të 8 vjeçarit , në banesën e fundit. Mes lotëve dhe trishtimit, familjarët e të afërmit e djalit i kanë dhënë lamtumirën fëmijës.
Institucionet e Bashkisë së Fierit, kanë mbajtur një minutë heshtje për ngjarjen makabre. Me qirinj në duar, ata kanë dalë jashtë institucioneve shtetërore dhe kanë heshtur për një minutë.
Kjo ishte e paralajmëruar nga kryetari i bashkisë së Fierit, Armando Subashi disa orë më parë, me anë të një postimi në rrjete sociale.
“Duke dënuar ashpër krimin e kryer ndaj Mateos 8- vjeçar dhe duke apeluar për një hetim, gjykim dhe dënim të shpejtë të autorit të ngjarjes makabre, dita e sotme, 17 Nëntor 2021 do të jetë një ditë zie në shenjë solidariteti me familjen e Mateos për Bashkinë e Fierit. Në të gjitha institucionet e Bashkisë Fier, në orën 12.00 do të mbahet një minutë heshtje”, u shpeh Subashi.
Autori i ngjarjes makabre ishte akuzuar e dënuar edhe më herët për të tilla ngjarje, megjithatë, endej i lirë.
