Kryeministri i Kosovës, Albin Kurti ka reaguar për ngjarjen e rëndë në Pejë, ku mbeti i vrarë kandidati i PDK për këtë Komunë, Astrit Ademaj dhe zyrtari tjetër i kësaj partie, Blerand Kadrijaj dhe u plagos vëllai i të parit. Nga informatat e para u mësua se Ademaj dhe Kadrijaj vranë njëri tjetrin pas një konflikti në një lokal, ndërsa Kurti e ka quajtur ngjarjen tronditëse.
Ai u shpreh ngushëllimet familjarëve dhe u bën thirrje organeve të rendit të zbardhin rastin sa më parë rastin e rëndë.
Reagimi i plotë:
Sonte u tronditëm nga ngjarja e rëndë që ndodhi në qytetin e Pejës. Sipas konfirmimit zyrtar të Policisë së Kosovës në vendin e ngjarjes kanë mbetur të vrarë dy qytetarë të vendit tonë, kandidati për kryetar të komunës së Pejës, A. A., dhe, ish kandidati për kryetar të Deçanit, B. K., të dy nga radhët e Partisë Demokratike të Kosovës.
U shpreh ngushëllimet më të sinqerta familjeve të viktimave, miqve dhe bashkëpunëtorëve nga Partia Demokratike e Kosovës. Në këto momente të vështira bashkëndjejmë me dhimbjen e tyre për këtë humbje kaq tragjike.
Ftoj organet e rendit që me seriozitetin më të lartë, sa më parë të zbardhin rastin e kësaj vrasje të dyfishtë.
