Policia e Kosovës ka arrestuar tre persona, në lidhje me vrasjen e trefishtë pak ditë më parë në Gllogjan.
Tre personat e arrestuar Halil Mehmetaj dhe dy djemtë e tij, Kreshnik dhe Malsor Mehmetaj, dyshohet se kanë lidhje me vrasjen e shoferit Gani Gjokaj dhe dy nxënësve Genta Mustafaj dhe Ledion Hamzaj në Gllogjan.
Ndërkohë, motivi i sulmit ndaj autobusit në Gllogjan, sipas mediave kosovare dyshohet se lidhet me vetëvrasjen e 20-vjeçares nga Gllogjani, Heroina Mehmetajt, më 14 qershor 2020. Arsyeja e vetëvrasjes së 20-vjeçares dyshohet të jetë shoferi i vrarë, Gani Gjokaj.
Malsori bashkë me vëllain Kreshnikun, e babain Halilin dyshohet se u hakmorrën ndaj shoferit të autobusit Gani Gjokaj, të cilin dyshohet se e vranë pasi e fajësonin për vetëvrasjen e më të dashurës së tyre, Heroinës.
Kryeprokurori i Prokurorisë Themelore Peje, Agim Kurmehaj konfirmoi arrestimin e 3 personave:
“Pas ndodhisë kemi filluar hetimet intensive së bashku dhe me ndihmën e Prokurorit të Shteti dhe njësive relevanete policore dhe pas punës intensive, me vendimin e prokurores së çështjes janë arrestuar tre persona me dyshimin se kanë kryer veprën penale “vrasje e rëndë””, ka thënë ai në një konferencë të jashtëzakonshme për media.
Ai tha se për shkak të ndjeshmërisë së rastit nuk do të japin detaje dhe po për këtë arsye s’do të pranojnë pyetje nga gazetarët.
“Prokurorja ka caktuar dhe lëshuar vendimin për 48 orë ndalim dhe është në përgatitje për dorëzimin e kërkesës për masën në procedurë penale. Duke marrë parasysh ndjeshmërinë e rastit, s’mund të japim informata të tjera që do ta dëmtonin procesin e hetimeve. Ne zotohemi se edhe pas arrestimit të tyre, do të vazhdojmë me intensitet ndërmarrjen e të gjitha veprimeve të nevojshme për ndriçimin e këtij rasti”.
Kujtojmë se vrasja e trefishtë ndodhi mbrëmjen e 26 Nëntorit në Gllogjan, ku disa persona sulmuan dhe qëlluan me kallashnikov drejt autobusit që transportonte nxënës shkolle. Nga të shtënat me armë humbën jetën shoferi dhe dy nxënësit, ndërsa u plagosën disa të tjerë.
