Policia ka identifikuar dhe shpallur në kërkim një person të dyshuar për vrasjen e 57-vjeçarit Pjetër Kazaj në fshatin Tale të Lezhës.
Sipas informacioneve të siguruara nga forcat e rendit, autori dyshohet të jetë një shtetas me inicialet G.A., i cili qëlloi me armë automatike në momentin që viktima po zbiste nga makina për të hapur portën e banesës së tij.
Në njoftimin zyrtar të policisë bëhet me dije se hetimet intensive, mbledhja e provave në vendngjarje dhe informacionet e siguruara nga inteligjenca policore kanë mundësuar identifikimin e autorit dhe nisjen e kërkimit për kapjen e tij.
Viktima humbi jetën menjëherë në vendin e ngjarjes si pasojë e plagëve të marra. Grupi i posaçëm hetimor, nën drejtimin e Prokurorisë, vazhdon punën për zbardhjen e plotë të rrethanave të krimit dhe për dokumentimin ligjor të tij.
Policia po kryen kontrolle intensive në terren për kapjen e personit të shpallur në kërkim.
Si pistë kryesore e hetimit është marrë edhe hakmarrja, në kuadër të një konflikti të gjatë dhe të përgjakshëm mes familjeve Kaza dhe Gjini, që daton që nga vitet ‘90. Në janar të vitit 1994, në qytetin e Rrëshenit u vra me armë zjarri shefi i krimeve, Ndue Kaza, ngjarje për të cilën dyshohen Dod dhe Augustin Gjini, të cilët u arratisën pas ngjarjes.
Në vitin 1997, për hakmarrje, Martin Kaza vrau dy vëllezërit Dod dhe Augustin Gjini në Laç. Ai u dënua me 22 vite burg për “vrasje me paramendim” dhe “armëmbajtje pa leje”. Pas arrestimit në Londër, Martin Kaza u ekstradua në Shqipëri në vitin 2017 dhe po kryen dënimin.
Megjithatë, konflikti mes dy familjeve nuk është mbyllur, pasi edhe pas shumë viteve janë regjistruar incidente të tjera të dhunshme, përfshirë sulmin me katër plumba ndaj Agustin Kazajt, i cili u qëllua ndërsa po pinte kafe.
