Kryeministri Edi Rama ka shprehur mbështetjen e tij të plotë ndaj ministres së Arsimit, Ogerta Manastirliu, pas kërkesave të shumta për dorëheqjen e saj, si pasojë e tragjedisë së vrasjes së 14-vjeçarit Martin Cani.
Gjatë një takimi me prindër dhe mësues, ku prezantoi masat e reja për rritjen e sigurisë në shkolla, Rama deklaroi se ministrja ka luajtur një rol kyç në transformimin e sistemit arsimor dhe shëndetësor të vendit.
“Dua të shpreh publikisht mbështetjen time për ministren Manastirliu, e cila ka dhënë një kontribut të pamohueshëm për transformimin e arsimit dhe shëndetësisë. Ata që po kërkojnë të përfitojnë nga një tragjedi kaq e rëndë për të bërë akuza absurde dhe për të kërkuar përgjegjësi personale, janë thjesht duke manipuluar një situatë tragjike për përfitime politike,” tha Rama.
