Gjykata e Apelit e Kosovës ka lënë në fuqi dënimin me burgim të përjetshëm ndaj Dardan Krivaqës, i cili u shpall fajtor për vrasjen e Marigona Osmanit.
Po ashtu, Apeli ka vërtetuar dënimin me 15 vjet burgim ndaj Arbër Sejdiut, i cili u dënua për “ndihmë në kryerjen e vrasjes së rëndë”.
Marigona Osmani, ishte 18 vjeç, kur u vra më 22 gusht 2021 në banesën e Krivaqës në qytetin e Ferizajt.
Fillimisht, Krivaqa dhe Sejdiu ishin dënuar për vrasjen e Osmanit në gusht të vitit 2023, por Apeli, pas disa ankesave nga mbrojtja, e ktheu rastin në rigjykim.
Më 26 shtator 2024, shkalla e parë e gjyqësorit shqiptoi dënimet ndaj të akuzuarve, ndërsa më 19 shkurt 2025, Apeli i shpalli ankesa të pabaza dhe e la të pandryshuar aktgjykimin.
Në njoftimin e Apelit u theksua se nuk ka pasur shkelje të dispozitave të procedurës penale dhe se të gjitha provat e përdorura gjatë gjykimit janë vlerësuar si të drejta dhe ligjore.
Gjithashtu, Apeli theksoi se nuk ka gjetur as shkelje të ligjit lidhur me lartësinë e dënimit të shqiptuar nga Gjykata Themelore e Ferizajt.
