Hetimet për vrasjen e Klaudio Prendit janë transferuar në Prokurorinë e Posaçme (SPAK), e cila dyshon se ngjarja është rezultat i aktiviteteve të një grupi të strukturuar kriminal.
Klaudio Prendi, 27 vjeç, u vra më 19 Nëntor në Tiranë, në afërsi të Xhamllikut, nga një sulm me armë silenciator, ndërsa po hipte në makinën e tij.
Autorët përdorën një makinë të vjedhur “Audi A4”, të cilën e dogjën në zonën e Farkës pas ngjarjes.
Hetimet kanë identifikuar makinën nga shasia dhe kanë gjetur një pistoletë të djegur.
Një nga pistat kryesore është konflikti i viktimës me borxhet dhe baste sportive, pasi ai dyshohet se kishte për të kthyer një shumë prej 15 mijë eurosh dhe ishte përfshirë në një sherr disa ditë më parë.
Babai i viktimës, ish-gjyqtari Fran Prendi, ka pranuar që djali kishte konflikte, por nuk e imagjinonte se ato mund të përfundonin me një atentat.
Hetimet vazhdojnë për të zbuluar të gjitha rrethanat dhe motivet pas ngjarjes.
