Bashkëshortja e të policit të vrarë Arben Bilali, kanos Prokurorin Bajram Breçani. Ajo e akuzon Breçanin se ka ndihmuar në lirimin e të akuzuarit për vrasjen e të shoqit.
Sipas informacioneve për mediat, Breçani ishtë ulur përballë shkollës ‘Harry Fultz’ në momentin që është kërcënuar nga Matilda Bilali, e cila mban detyrën e oficeres së Policisë.
Prokurori Breçani ka hetuar vrasjen e bashkëshortit të saj, Arben Bilalit dhe i dyshuari i vrasjes ka qenë Gjergj Cukali, i njohur ndryshe si “i forti i Myslym Shyrit”.
Pavarësisht se prokurori ka dhënë urdhër për arrestimin e tij, Gjykata e Apelit e ka liruar. Breçani është kërcënuar për herë të tretë nga gruaja e viktimës, Arben Bilali.
“Kam njoftuar drejtuesit e policisë së shtetit Ardi Veliu, dhe zyrtarë të tjerë në lidhje me ngjarjen e ndodhur dhe pres prej tyre reagim ligjor. U kërcënova për shkak të detyrës dhe kjo është hera e tretë, për një çështje për të cilën vendimmarrja ka qenë tërësisht e gjykatës”,- ka thënë prokurori Breçani për mediat.
Ngjarja e rëndë ndodhi më 30 janar të 2019. Të paktën 14 herë u qëllua mbi Arben Bilalin, me një armë automatike kallashnikov. Për shkak të plagëve të rënda të marra, ai ndërroi jetë në spital, ku u transportua nga persona që ndodheshin në vendin e ngjarjes. Policia arriti të gjejë prova të mjaftueshme për të kuptuar dinamikën e atentatit. Përveç gëzhojave të shumta, ajo sekuestroi të gjitha pamjet filmike të bizneseve ku ndodhi ngjarja, e zbuloi se atentatorët lëviznin me një automjet tip “Benz Mercedes”, me ngjyrë blu të errët dhe me targa të falsifikuara.
Autorët hapën zjarr, ndërsa viktima Bilali, i cili ka qenë një ish-punonjës policie, ishte në automjetin e tij “Hyundai”. Në atë moment kishte parkuar për të shkuar në një lokal në afërsi të vendngjarjes. Krimi ka ndodhur në të njëjtin vend, ku viktimës i kishin vrarë vëllain 9 vite më parë.
Pas 5 muajve hetimesh u arrestua Gjergj Cukali i cili u akuzua për ekzekutimin e ish-policit Arben Bilali. Përmes metodave speciale të hetimit, Policia bëri të mundur zbulimin e të dyshuarit dhe arrestimin e tij.
Gjergj Cukali është një emër i njohur për Drejtësinë, për shkak të precedentëve të tij të mëparshëm penalë, si një person i dënuar për veprat penale prodhim dhe shitje e narkotikëve, armëmbajtje pa leje dhe rrëmbim personi. Vetëm katër muaj ka qëndruar në paraburgim i dyshuari si vrasës me pagesë i ish-policit, Arben Bilali, më pas është liruar. Gjergj Cukali, për të cilin policia dha një deklaratë të bujshme, ka fituar lirinë në heshtje të plotë nga Gjykata e Apelit të Tiranës . Për shkak se Prokuroria deklaroi se kishte gjetur prova shkencore dhe se ADN e tradhtonte në mjetin ku u krye ekspertiza, me herët Gjykata e Tiranës i kishte çmuar të plota provat dhe e kishte lenë të dyshuarin në masën arrest me burg për akuzën e vrasjes me paramendim. /Gazetareforma.com/
