Në një letër drejtuar prokurorëve të Romës, të cilët po hetojnë çështjen e vrasjes së shqiptares Ilaria Sula, autori i dyshuar Mark Samson ka shpjeguar versionin e tij të ngjarjes. Ai shkruan se më 25 mars, nga ora 22:15 deri në mesnatë, kishin folur për marrëdhënien e tyre.
Sipas tij, ishte lodhur nga pritja dhe, ndërkohë, Ilaria kërkonte të lidhej me persona të tjerë. Samson pohon se, kur u bë vonë, ajo e pyeti nëse mund të qëndronte natën në banesën e tij. Ai thotë se i dha disa pizhame për të fjetur më rehat dhe më pas u shtrinë së bashku, duke biseduar për kujtimet e bukura që kishin ndarë gjatë lidhjes së tyre.
“Nga ora 22:15 e 25 marsit deri në mesnatë folëm për marrëdhënien tonë, për faktin se më shqetësonte dhe isha lodhur duke pritur dhe ndërkohë ajo kërkonte njerëz të tjerë për t’u lidhur. Po bëhej vonë, kështu që ajo më pyeti nëse mund të qëndronte natën në shtëpinë time. I dhashë disa pizhame që të flinte rehat. U shtrimë në shtratin tim dhe filluam të flasim për gjërat e mira që kishim përjetuar së bashku, përvojat, udhëtimet dhe nofkat që i vinim njëri-tjetrit. ‘Amore’, ‘tesoro’, ‘vita’, pastaj kaluam te fjalët shqipe ‘shpirt’, ‘zemra ime’ dhe ato filipinase ‘bebe ko’, ‘mahal’, ‘asawa’”, ka shkruar ai.
22-vjeçarja shqiptare Ilaria Sula, u vra me thikë nga ish-i dashuri i saj filipinas, në banesën e tij në Romë. Pas krimit, ai e futi trupin në një valixhe dhe e hodhi në një zonë pyjore jashtë qytetit.
Më pas përdori telefonin e saj për të mashtruar shoqet e Ilarias, duke pretenduar se ajo kishte shkuar pranë Napolit. I riu akuzohet për vrasje me dashje dhe fshehje kufome, ndërsa nëna e tij po hetohet për bashkëpunim. Në rrëfimin e tij, ai zbulon se ndaloi për të blerë cigare me trupin në makinë.
