Janë zbardhur të tjera detaje nga krimi i rëndë në Itali, ku 45-vjeçarja shqiptare Gentiana Hudhra u vra me thikë nga ish-bashkëshorti i saj, Nikollaq Hudhra.
Krimi ndodhi më 14 qershor në Tolentino, ku viktima u godit me një thikë kuzhine rreth 18 cm të gjatë dhe më pas u qëllua me shkelma, duke mbetur e vdekur në vend.
Sipas hetuesve, Nikollaqi kishte mbërritur në vendngjarje me monopatinë elektrike, një zgjedhje e qëllimshme për të shmangur identifikimin, pasi, siç pranoi vetë më pas, “ajo e njihte makinën time”.
Pas krimit, ai nuk u largua, qëndroi ulur pranë trupit të pajetë të Gentianës, derisa mbërriti policia dhe e arrestoi.
Një histori e paralajmëruar dhune
Nuk ishte hera e parë që Nikollaq Hudhra kishte ushtruar dhunë ndaj ish-bashkëshortes së tij. Në vitin 2021, Gentiana e kishte denoncuar dy herë për dhunë në familje, por hetimet u mbyllën me vendim të Prokurorisë së Maceratas në dhjetor të po atij viti. Ndarja mes tyre u formalizua në janar të 2022, pas 20 vitesh martesë.
Avokati që përfaqësoi Gentianën në atë kohë, Guglielmo De Luca, tha se Nikollaqi kishte zhvilluar fiksime paranojake:
“Ai kishte idenë e fiksuar se ajo e helmonte. Në shtëpi kishte vendosur një zinxhir në frigorifer. Para ndarjes kishte ndryshuar bravën e derës për ta mbajtur larg. Më pas, falë dy kërkesave, i lejoi të kthehej, por e detyronte të flinte në një dhomë të vogël në një divan. I thashë të largohej nga ai burrë, por ajo priti për shkak të shqetësimit për fëmijët,” u shpreh De Luca.
Vëllai i viktimës, Artur Kopili, i cili mbërriti në Tolentino nga Shqipëria pas ngjarjes, deklaroi se dhuna ishte e njohur në rrethin e afërt, por autoritetet nuk ndërhynë në kohë:
“Të gjithë e dinin këtë situatë. Motra ime e kishte denoncuar disa vite më parë ish-burrin, por askush nuk ndërhyri,” u shpreh ai.
Çifti kishte dy djem, Mario dhe Samuel, përkatësisht 21 dhe 23 vjeç. Pas ndarjes, Gentiana qëndroi në Tolentino, ndërsa Nikollaqi u shpërngul në Passignano sul Trasimeno, ku punonte në një fermë.
Punëdhënësit e përshkruajnë si një punonjës të rregullt, por me sjellje të ndryshme në muajt e fundit:
“Është një punonjës i mirë, shumë i saktë dhe i përpiktë. Puna është e lodhshme dhe rrallë kush qëndron kaq gjatë. Kohët e fundit kishte shfaqur sjellje të çuditshme, por askush nuk mund të imagjinonte një përfundim të tillë. Është e pabesueshme,” thanë ata për mediat.
Hetimet dhe akuza
Nikollaq Hudhra është aktualisht në burgun e Montacutos në Ankona dhe ndaj tij rëndon akuza e vrasjes me paramendim. Në dëshminë e tij para autoriteteve ka pranuar jo vetëm krimin, por edhe faktin se kishte tentuar më parë ta vriste ish-gruan.
Hetimet po përqendrohen në zbulimin e motiveve që qëndrojnë pas përpjekjeve të mëparshme për atentat.
Autopsia e trupit të viktimës do të kryhet nga mjeku ligjor Antonio Tombolini për të përcaktuar me saktësi numrin dhe natyrën e plagëve, si dhe për të identifikuar plagët që ishin fatale për Gentianën.
